Себастијан Фетел го презеде врвот во генералниот пласман во Формула 1 шампионатот по третата трка во сезоната. Германецот беше најбрз попладнево за ГН на Бахреин за втора негова победа во 2017 година. Времето што притоа го оствари беше 1:33:53 часа оставајќи ги зад себе двата пилота на Мерцедес, Британецот Луис Хамилтон (+6.660 сек.) и Финецот Валтери Ботас (+20,397 сек.) кој стартуваше од пол-позицијата на патеката „Сакир“.
Четвртото место го освои клупскиот колега на Фетел, Кими Раиконен, а меѓу првите десет се сместија уште Рикардо, Маса, Перез, Грожан, Хулкенберг и Окон.
Колоната болиди во Бахреин ја поведе Ботас. Финецот почна добро и на првиот свиок го одби нападот на Фетел кој, пак, во меѓувреме, го престигна Хамилтон. Германскиот пилот набрзо, сепак, успеа до врвот. Го посети боксот, смени пневматици, а како „кец на десетка“ му дојде излезот на сигурносното возило на патеката по колизијата на Карлос Сајнц и Ленс Строл во 14 круг.
На сето тоа влијаеше и кикс на Хамилтон што на крајот, можеби, го чинеше и триумф. При влегување во бокс, Британецот непотребно направи опструкција на Рикардо, го забави австралискиот колега, за што беше казнет со пет секунди.
Кон средина на трката, Мерцедес го повлече и Ботас во боксот, механичарите го променија сетот пневматици на неговиот болид со што Финецот доби на брзина. Следуваше идентичен одговор и од Ферари со Фетел. Тоа го искористи Хамилтон и изби на првото место. Фетел се врати на патеката меѓу двата болида на Мерцедес со временско заостанување од 16 секунди, односно, 11 поради споменатата казна на Британецот.
Мерцедес не сакаше да ризикува и да го остави Хамилтон да вози со истрошени гуми на 20 круга до крај на трката. Го повика во бокс во 41 круг и на враќање на „одлежа“ времената казна од пет секунди. Во сообраќај се врати како трет со 18 секунди зад Фетел и девет зад Ботас. Со секој изминат круг „грицкаше“ по половина секунда од предноста на лидерот, но прилика за закана не дочека, па Германецот без проблеми мина како прво низ целната линија по 44. пат во неговата кариера.
Наредната трка во Ф1 шампионатот е на 30 април на автодромот во Сочи за ГН на Русија.
Резултати од трката за ГН на Бахреин
Себастијан Фетел (Ферари/Германија) 1:33:53,374 часа
Луис Хамилтон (Мерцедес/В. Британија) +6,660 сек.
Валтери Ботас (Мерцедес/Финска) +20,397 сек.
Кими Раиконен (Ферари/Финска) +22,475 сек.
Даниел Рикардо (Ред Бул/Австралија) +39,346 сек.
Фелипе Маса (Вилијамс/Бразил) +54,326 сек.
Серхио Перез (Форс Индија/Мексико) +62,606 сек.
Роман Грожан (Хас/Франција) +74,865 сек.
Нико Хулкенберг (Рено/Германија) +80,188 сек.
Естебан Окон (Форс Индија/Франција) +95,711 сек.
Пласман кај возачи во 2017 година
Себастијан Фетел (Германија) 68 бода
Луис Хамилтон (В. Британија) 61
Валтери Ботас (Финска) 38
Кими Раиконен (Финска) 34
Макс Ферстапен (Холандија) 25
Даниел Рикардо (Австралија) 22
Фелипе Маса (Бразил) 16
Серхио Перез (Мексико) 14
Карлос Сајнц Јр. (Шпанија) 10
Роман Грожан (Франција) 4, итн.
Пласман кај конструктори во 2017 година
Ферари 102 бода
Мерцедес 99
Ред Бул 47
Форс Индија 17
Вилијамс 16
Торо Росо 12
Хас 8
Рено 2
Заубер 0
Мекларен 0