Луис Хамилтон беше најумешен во „маратонот“ на патеката Интерлагос и победи во претпоследната трката во Формула 1 шампионатот што се возеше за ГН на Бразил. Со ова Британецот, како актуелен првак, ги задржа шансите за одбрана на тронот. Одлуката ќе падне на последната станица за оваа сезона во Абу Даби на 27 ноември.
До 52 триумф во кариерата, деветти во оваа календарска година, трет во низа и премиерен на асфалтот крај Сао Паоло, тој стигна со време 3:01:01.335 часа. Второто место со задоцнување од 11.455 секунди му припадна на неговиот клупски колега, Нико Розберг на кого му требаше победа за обезбедување на титулата, по него низ целта мина Макс Ферстапен (+21.481 сек.). Бодови освоија уште Серхио Перез, Себастијан Фетел, Карлос Сајнц, Нико Хулкенберг, Даниел Рикијардо, Фелипе Наср и Фернандо Алонсо.
Лидер во генералниот пласман е Нико Розберг со 367 бода, Хамилтон е втор со 355 и тие двајцата се единствени конкуренти за титулата во Ф1 првенството во оваа сезона. Далеку зад се Рикијардо со 246 бода, Фетел со 197, Ферстапен со 192, итн.
Трка со два прекина, силен дожд и забивање на Раиконен во заштитниот ѕид
Денешната трка за ГН на Бразил ја одбележа големо невреме и изобилство од вода на Интерлагос. Силниот дожд предизвика мноштво извртувања на болидите, лизгања, инциденти и забивање на Кими Раиконен воеден од заштитите ѕидови крај патеката. Покрај поместувањето на стартот за десетина минути, натпреварот имаше и два прекина поради што мораше да излегува и безбедносното возило. И покрај забелешките на возачите за ненормални услови за настап, сепак, трката се одржа, а тие беа принудени да покажат страшни вештини и снаодливост бидејќи и најмала грешка можеше скапо да ги чини што дел од нив и ги чинеше.
Првиот прекин се случи во 20 круг и дојде како последица на инцидентот на финскиот пилот на Ферари. Раиконен заврши во заштитната ограда, а делови од неговиот болид се растурија по патеката. Останатите возачи што се движеа во него, се обидуваа да избегнат судир, па организаторот се огласи и означи прекин на трката што траеше 4о-тина минути. Продолжи со т.н. „safety car“ што од безбедносни причини ја предводеше колоната до 29 круг кога натпреварот повторно беше прекинат. Набрзо, сепак, беше дадено зелено светло и ГН на Бразил го дочека својот крај по повеќе од три часа.
Резултати од трката за ГН на Бразил
Луис Хамилтон (Мерцедес) 3:01:01.335 часа
Нико Розберг (Мерцедес) + 11.455 сек.
Макс Ферстапен (Ред Бул Рејсинг) + 21.481 сек.
Серхио Перез (Форс Индија) + 25.346 сек.
Себастјан Фетел (Ферари) + 26.334 сек.
Карлос Сајнц (Торо Росо) + 29.160 сек.
Нико Хулкенберг (Форс Индија) + 29.827 сек.
Даниел Рикијард (Ред Бул Рејсинг) + 30.486 сек.
Фелипе Наср (Заубер) + 42.620 сек.
Фернандо Алонсо (Мекларен) + 44.432 сек.
Генерален пласман
Нико Розберг (Германија/Мерцедес) 367 бода, Луис Хамилтон (В. Британија/Мерцедес) 355, Даниел Рикијардо (Австралија/Ред Бул Рејсинг) 246, Себастијан Фетел (Германија/Ферари) 197, Макс Ферстапен (Холандија/Ред Бул Рејсинг) 192, итн.