Испраќам и апел до граѓаните – сите штети кои ги имаат да ги пријават до општината, на контактите кои дополнително ќе бидат објавени, нагласи Коњановски и додаде дека итно ќе се формира комисија за проценка на штетите во однос на синоќешниот земјотрес, која ќе излезе на терен
Тресењето беше непријатно и многу се исплашивме. Живеам на трети кат и веднаш излеговме надвор пред зграда каде останавме неколку часа додека не се смири состојбата. Па Битола е на само 20 километри од Лерин, каде беше епицентарот на синоќешниот земјотрес. И денеска имаше мали потреси, околу 30, a велат тоа е нормално, афтершокови се, раскажува жителка на Битола која и денеска беше вознемирена од синоќешниот земјотрес кој со силина од 5,5 степени по Рихтер со епицентар во Лерин, синоќа во 22.44 часот го погоди подрачјето околу македонско-грчката граница.
Потресот беше почувствуван и пошироко во регионот – во Македонија, Албанија, Србија, Црна Гора.
Штетите од земјотресот во Битола и регионот се испукани ѕидови и тавани на куќи и згради, оштетени фасади. Оштетувања во внатрешноста има и на Клиничката болница во Битола и тоа на главната зграда, па дел од пациентите се пуштени на домашно лекување, а откажани се и дел од планираните операции.
– За санирање на штетите ќе се бара помош и од Владата, изјавија за НОВА ТВ од општинскиот кризен штаб во Битола кој денеска одржа итен состанок за состојбата во Битола по вчерашните серија земјотреси.
За среќа, нема загинати и повредени.
Коњановски: Затекнавме паника, граѓаните беа излезени
Како што соопштија од Општина Битола, денеска се донесени и конкретни мерки за постапување во интерес на граѓаните. Градоначалникот Тони Коњановски и Претседателката на Советот, Илиевска, по состанокот информираа за мерките коишто ќе бидат преземени:
– Уште вчера по 22.44 часот, после земјотресот кој ја зафати Битола, кој не потсети на оние времиња од 1994 година, излегов на терен заедно со дел од кризниот штаб, како и дел од советниците од Советот на Општина Битола, да ги увидиме првичните состојби во градот. Затекнавме паника, што е нормално во вакви ситуации, граѓаните беа излезени, посебно од колективните згради, висококатниците, но и сите други граѓани. Се обративме, првично во Службата за итна медицинска помош, како и единицата за противпожарна заштита. За среќа, немаше повици за повредени и за материјални штети во првичните моменти – изјави на денешната прес-конференција градоначалникот Тони Коњановски, информираат од Општината.
Тој испрати и апел до граѓаните:
– Итно ќе се формира комисија за проценка на штетите во однос на синоќешниот земјотрес, која ќе излезе на терен, а е составена од стручни служби од Општина Битола, потпомогнати од ИЗИС. Испраќам и апел до граѓаните – сите штети кои ги имаат да ги пријават до општината, на контактите кои дополнително ќе бидат објавени. Од здравствените институции бевме информирани дека немаше пријава на повредени во однос на синоќешниот земјотрес – нагласи Коњановски.
Илиевска: Битола во најкус можен рок да ги санира штетите, имаме објекти кои се под заштита
Претседателката на Советот, Габриела Илиевска, информираше:
– На седницата на Советот имаме неколку дополнителни точки: формирање на комисија за штети, настанати по земјотресот и донесување на заклучок, кој ќе го доставиме до Владата на Република Македонија и ќе бараме одржување на итна седница, на која ќе се разгледа состојбата во Битола и на која ќе побараме и самата Влада да излезе во пресрет на она што ѝ се случи на Битола. Колкави се штетите, не знаеме сеуште. Но, во Битола имаме големи институции: болници, градинки, суд, објекти кои се под заштита и сметам дека и таму ќе треба да се предвидат големи финансиски средства, бидејќи нивната реконструкција ќе чини повеќе, бидејќи дел од нив се стари градби. Затоа сметаме дека треба да побараме ваква седница, каде државата ќе излезе во пресрет за нашиот град, бидејќи сметаме дека Битола, мора во најкус можен рок да ги санира штетите кои и се случија минатата ноќ, изјави Илиевска.
(Љ.Б.)