По силните и поројни дождови Вардар се излеа повторно кај Јагуновце во тетовскиот регион, бидејќи водостојот се искачил од вообичаените 60 на 63 кубици вода.
Во село Радиовце, општина Брвеница, Боговињска река досега поплави 300 хектари пченка, пченица и градинарски култури, како и подруми на 20-ина куќи.
Револтирани поради тоа што овие состојби траат околу две недели, жителите на Радиовце денеска го блокираа локалниот пат Жеровјане – Радиовце од 9 до 12 часот и најавија дека блокадите ќе траат се додека не се изнајде решение за овој проблем.
Нивото на најголемата река во земјава е зголемено но нема опасност за излевање во скопскиот регион бидејќи водостојот се регулира и преку хидроцентарлата Козјак.
Од Управата за хидрометеоролошки работи информираат дека вообичаениот просек на водостојот на река Вардар во Скопје во овој период од годината е 102 кубици вода, а утрово во 7 часот биле измерени 130 кубици.
НОВА забележа дека водата во Вардар веднаш под Камениот мост достигнува врвот на првите скали од кејот на реката.
Едната од двете скулптури Пливачки сосема е под вода, а втората статуа е потопена до врат, односно над водата ѕирка само главата на пливачката.
Според информациите од УХМР сегашното ниво на водата не е никаква закана за поплава, „за да се потопат и вторите скали потребни се 300 кубици вода“, велат за НОВА од Управата.
Според нив нивото на притоката на Вардар, реката Лепенец покрај дождовите го зголемило и топењето на снеговите од планините.