Министерот за внатрешни работи Оливер Спасовски утрово ги посети повредените полицајци кои, рече, се храбри припадници на македонската полиција што беа повредени при извршување на службени дејствија на вчерашниот јавен собир пред Владата, МНР и пред Собранието.
Спасовски, притоа, го осуди насилството над полициските службеници кои настрадаа додека ја извршуваа својата должност.
„Во свое име и во име на раководството на МВР изразувам длабока почит за храброста и херојството во одбрана на државните институции и од срце им посакувам брзо закрепнување“, изјави тој.
Спасовски уште еднаш потенцираше дека се повредени 47 полициски службеници, од кои 11 со потешки, а двајца со сериозни повреди.
„На сите повредени полициски службеници им е укажана лекарска помош, а потешко повредените се пренесени во медицинските установи за санирање на повредите и медицинска нега“, рече министерот.
Тој дополни и дека нема ниту еден повреден граѓанин, приведени се 11 лица, и дека од страната на полицијата не биле употребени ни пиротехнички, ниту хемиски средства за разбивање на толпата.
„Уште еднаш сакам да упатам апел до граѓаните да не потпаѓаат под никакви провокации, чија намена очигледно е нечесна и исклучиво водена од мотивите за остварување на политичка агенда, а организаторите на протестите и граѓаните ги повикувам да покажат демократски капацитет, да победи здравиот разум, и да не се повтори никогаш веќе 27 април“, порача министерот за внатрешни работи.
Тој подвлече и дека во Северна Македонија нема место и нема оправдување за насилство. „Дијалогот треба да се води во институциите на системот, а македонската полиција е токму гарантот за безбедноста на државата и нејзините граѓани.
Благодарност до граѓаните кои дадоа поддршка за МВР и полициските службеници кои стоеја во одбраната на безбедноста, како и до медиумите за објективното информирање“, вели министерот Спасовски. (С.К.)