Македонија и оваа година е делумно слободна земја според најновиот извештај на Фридом Хаус, „Слободата во светот 2017“. Земјава е меѓу најлошо рангираните европски земји, со вкупно 57 поени на скалата од 0 (најлошо) до 100 (најдобро).
Зад Македонија, во Европа, се наоѓаат само Белорусија, Русија, Турција, Босна и Херцеговина и Косово.
Во Извештајот насловен како „Популисти и автократи: Двојна закана за глобалната демократија“,Фридом Хаус нотира последователен пад на глобалните слободи веќе 11 години.
Во него 87 земји во светот имаат статус „слободни, 59 „делумно слободни, додека 49 се означени како „неслободни“ држави.
Од организацијата регистрираат назадување во политичките и граѓанските права и кај голем број од „слободните“ држави, како Србија, Унгарија, Франција, САД, Бразил и други.
Регионите на Блискиот Исток и Северна Африка имаат најлоши рејтинзи во светот во 2016, додека блиску до нив се наоѓа и евроазискиот регион.
Од државите кои се означени како „неслободни“ на последното место е Сирија која има негативен рејтинг од -1, иако скалата е од 0 до 100 поени.
Во последните 10 години најголеми падови во рангирањето се забележани во Централноафриканската Република, Турција, Гамбија и Мали.
Најслободните држави, со 100 поени се Норвешка, Шведска и Финска следени од Канада и Холандија кои имаат 99 поени.