Египет и Уругвај очајнички посакуваат со победа да стартуваат на Светското фудбалско првенство во Русија попладнево од 14 часот на „Екатеринбург арена“ во Екатеринбург. „Фараоните“ поради првиот настап на завршните турнири по речиси три децении, „ла селеста“, пак, за прекинување на серијата без победа во премиерните мечеви на мундијалите од 1970 година. Јужноамериканската селекција од тогаш има три реми и исто толку порази и се надева дека, конечно, ќе тргне со триумф на голема сцена на крилјата на Луис Суарез и Единсон Кавани.
Она што, сепак, е во фокусот на внимание е враќањето на Мохамед Салах, египетскиот бог на фудбалот, кој, според најавите, успеа навреме да се рехабилитира по повредата во финалето во Лигата на шампиони. Таквата вест, покрај нацијата, со воодушевување на прими и селекторот Ектор Купер.
„Египет е среќен што го има еден од најдобрите фудбалери на таа позиција во светот. Мохамед Салах е египетски Меси, но ние не може да се потпираме само на него“, истакна Аргентинецот на клупата на Египќаните.
Египетската репрезентација има и неколку талентирани играчи кои својот потенцијал и можности ги демонстрираа низ африканските квалификации за СП 2018.
„Разбирам дека навивачите понекогаш имаат поинакви очекувања. Салах е ѕвезда, но постои постојат ситуации во кои голман или дефанзивец спасуваат. Има и фудбалери во средниот ред кои многу трчаат и работат во финкција на тимот“, нагласува Купер.
Искусниот Аргентинец е, исто така, силно мотивиран и желен за победа против Уругвај. Себеси се гледа како Египќанецот плус кој посакува три бода на отворањето на турнирот во Русија.
„Дури и против Аргентина сакам да победам. На оваа позиција сум три и пол години и се чувствувам како Египќанец и се надевам дека ќе славиме по мечот“, заврши египетскиот селектор.
Со дуелот меѓу Египет и Уругвај ќе биде комплетирано првото коло во групата А во која Русија, вчера попладне, ја декласира Саудиска Арабија со 5:0.