Новиот албум на Фулиш Грин“ (Foolish Green) официјално ќе биде објавен до крајот на овој месец, а бендот веќе ги открива деталите и за неговото концертно претставување пред публиката, закажано на 15. март , во арт киното „Фросина“ воМКЦ.
Како предгрупа на нивниот концерт ќе настапи „Џун“ (June), бендот кој изминатата година го промовираше својот деби албум „Someday Soon“ и веќе остава значајна трага на македонската музичка сцена, претставувајќи ја емотивната страна на префинетиот инди поп. По концертната вечер со Foolish Green, се најавува и „afterparty“ со докажаните хип хоп артисти на домашната сцена,диџеј Гоце (Саф) и ЛД Пистолеро.
„ESCAPE“ ќе биде првиот лонг-плеј албум на „Фулиш Грин“, но и едно од ретките изданија од ваков тип на музички правци на нашите простори, на кој ќе бидат претставени вкупно 12 композиции.
Деби албумот, кој ќе биде објавен за издавачката куќа „Пасворд Продакшн“, е снимен во домашно студио, со мастеринг на Дарко Спасовски – Пацки, додека зад музиката се потпишува Ненад Стефановски – Брус. Концептот за обвивката на албумот и дизајнот се на Мики Стефановски.