Поглаварот на Македонската православна црква, г.г Стефан, на Третата светска конференција за меѓурелигиски и меѓуцивилизациски дијалог, која денес и утре се одржува во Скопје, рече дека повеќе од потребно ни е враќање на трајните духовни (евангелски) вредности и да се потсетуваме на тоа дека секој човек треба да биде целосно слободен, што подразбира да може да сака и да биде сакан, да се надева и да верува, да биде во рамноправна заедница со другите, а особено во заедница со Бога.
– И покрај сите декларации за права и слободи, сè позабележителна е преокупацијата и тенденцијата како да се завладее со другите, на економски, политички, воен, па и духовен план. Никому и никаде не смее да му се одземе правото достоинствено да ја изразува и живее слободата, особено на религиозен план рече архиепископот на МПЦ, г.г. Стефан.
Во својот говор поглаварот на МПЦ рече и дека слободата не смее да стане предмет на обожување
– Слободата, посочи тој, никогаш не смее да биде „употребена“ до таа мера што ќе стане принцип, односно предмет на обожување, а на денешниот, на современиот човек како да му се случува тоа – сакајќи да биде слободен во сè и за сè, тој всушност се заробува и станува роб на сопствените страсти, на своите недостатоци.
Тој, исто така, рече и дека сè почесто се слуша за „вакви и онакви права“, но не слушаме за одговорности.
– Денешниот човек сака да побегне од овој свет, но не по патот што нуди мир, внатре во себе, со сите наоколу и со Бога, туку нуди привидно бегање од проблемите, од страдањата, и тоа во нереалниот свет каде што иако чувствуваме дека не сме решиле ништо, иако се гледаме кои сме и до каде сме, сепак се браниме со својата ароганција. Па затоа сè почесто слушаме за вакви и онакви права, но не слушаме за одговорности – рече архиепископот г.г. Стефан.