Жените на мирен протест, бараат социјална еднаквост.
Националната мрежа против насилство врз жените и семејно насилство по повод 8 Март, Денот на жената, организира мирен прост од Владата на РСМ до Паркот Жена борец. Целта на протестниот марш е да се испрати порака до јавноста, но пред се до надлежните институции дека жените се еднаква половина од населението во државата, а се уште не уживаат еднаквост во речиси ниту еден аспект од општествениот живот, ниту на работните места или дома, во политиката и социјалниот живот.
Годинава, маршот е под слоганот „Сиромаштијата има женско лице“.
„Со почит кон досегашните победи на жената за родовата еднаквост, но свесни за секојдневните системски недостатоци кои го загрозуваат нашето постоење како слободни, еднакви, достоинствени и безбедни. Овој 8 Март го одбележува женската сиромаштија, овозможена од системот, а продлабочена како резултат на двегодишната пандемија со ковид-19 и нејзините последици. Маршираме бидејќи држава во која жените не се вклучени како еднакви, е држава во која нема напредок. Општество во кое жените се невработени и преработени, незаштитени, виктимизирани, објективизирани и лишени од своите права, е сиромашно општество“, велат од Националната мрежа против насилство врз жените и семејно насилство.
На маршот се приклучи и министерката за труд и социјална политика, Јованка Тренчевска.
(Фото и видео: НоваТВ)