Премиерот Зоран Заев денеска во Влада ги прими претставниците на германската компанија „Гересхајмер“ каде одржаа работна средба на која беа презентирани плановите за инвестиции на компанијата во земјава.
Средбата доаѓа на само еден ден пред утрешното официјално отворање на фабриката „Гересхајмер” во Технолошко индустриската развојна зона Скопје 2.
Според Заев заложбите за инвестиции на „Герeсхајмер” во земјава ќе значат имплементирање на врвна технологија и нови вработувања, што пак ќе придонесе за подобрување на севкупниот економски раст.
На средбата во Влада, присуствуваа и заменик-претседателот за економски прашања и координација на економските ресори и инвестиции Фатмир Битиќи, директор на ТИРЗ Јован Деспотовски, како и директорот на Агенцијата за странски инвестиции, Дејан Павлески.
Ова ќе биде втор инвестициски циклус за производство на стаклени шприцеви за медицински цели. Според најавите, истата ќе биде најголема странска инвестиција досега реализирана во една фаза.
Првиот инвестициски циклус на „Гересхајмер” е петгодишен и започна во 2019 година, а се очекува да заврши до 2024 година со инвестиција од најмалку 25 милиони евра.