Работничкиот суд во Хамбург потврди дека му е даден отказ на возач од тој град затоа што колегата го поздравил со т.н. Хитлеров поздрав, јавуваат германските медиуми.
„Хитлеровиот поздрав со подигнување на испружена рака претставува силна и недвосмислена причина за отказ. Овој гест претставува нацистички симбол кој не мора да се трпи во рамки на работничките односи“, стои во образложението на судот.
Отпуштениот работник претходно жестоко се расправал со претседателот на работничкиот совет на фирмата во која работел, а потоа му салутирал како Хитлер и го нарекол нацист. Работодавецот поради тоа му дал отказ.
Отпуштениот вложил жалба тврдејќи дека тој, со оглед дека е од турско потекло, никако не може да биде нацистички симпатизер, па според тоа и отказот не е во ред.
Судиите од Работничкиот суд ги отфрлиле неговите аргументи, бидејќи во фокусот на овој случај е забраната за истакнување на симболи од нацистичкиот режим во јавноста и навредата кон колегата.
Нацистичкиот поздрав, во пишана или вербална форма, во Германија е забранет и за негова употреба следи затворска казна до три години.