Германија одбележува важен, голем ден од својата нова историја. Една од водечките земји на Европската унија и меѓу најразвиените економии во светот, ја слави 30 годишнина од паѓањето на Берлинскиот ѕид, симбол на поделбата на земјата од времето на Студената војна на комунистички исток и капиталистички запад.
Бетонскиот ѕид што се протегаше на 155 километри во должина и претставуваше граница меѓу Источна и Западна Германија беше изграден во 1961 година. Неговата функција, покрај територијално одделување на двата, идеолошки, спротивставени блока, беше и спречување на бегство на работната сила и политичките неистомисленици.
Според податоци на порталот GHDI (Германска историја во документи и фотографии) кој се повикува на информации на западногерманските власти, во периодот од 1949 година до 1962 година од Источна во Западна Германија пребегнале 2,7 милиони луѓе, бројка што по подигнувањето на Берлинскиот ѕид се сведе на 500.000. Официјалната, пак, верзија на источногерманските власти за ѕидот беше „антифашистичка заштитна бариера“ со цел да заштити од евентуална „агресија од запад“.
Ѕидот, покрај физичката поделба на Берлин, го затвори и западниот дел од градот. За време на подигнувањето беше обезбедуван од источногермански војници и вооружени групи на работничката класа кои имаа наредба да пукаат во секој што ќе се обиде да мине на другата страна. Комплетната граница меѓу Источна и Западна Германија беше затворена со ѕидови, мински полиња и други препреки. Проценките се дека при обид за бегство преку ѕидот загинале 140 лица меѓу кои и граничари.
Со либерализацијата во доцните 80-ти години од минатиот век и се послабото влијание на поранешниот Советски Сојуз (СССР) и политиките на Перестројката доведе до слободен пограничен режим во Источна Германија. Епилогот беа масовни демонстрации и пад на комунистичката власт. Тогашната влада на 9 ноември во 1989 година соопшти дека ќе дозволи преминување во Западна Германија и како резултат на тоа огромна маса на луѓе се доближи, а потоа и ја мина бетонската бариера. Од другата страна на ѕидот наидоа на славеничка атмосфера и пречек од голем број на западногерманци.
Еуфоричната маса за само неколку недели уништи најголем дел од Берлинскиот ѕид чиј пад беше прв чекор во обединувањето на Германија што официјално заврши на 3 октомври во 1990 година.
На централната манифестација во Берлин што е планирана во текот на денот ќе учествуваат германскиот претседател Франк Валтер Штајнмаер и канцеларката Ангела Меркел, како и гости и повеќемина државници од Европа. Вечерната прослава е закажана пред Брандербуршката порта, каде се очекува голем граѓански собир на кој ќе се обрати претседателот Штајнмаер.