Жителите на Гевгелија денеска на референдум треба да одговорат на прашањето дали се за или против отворање нa рудници на металични суровини во општината.
Утрово во 7 часот беа отворени сите 37 избирачки места на кои граѓаните ќе се изјаснуваат по референдумското прашање.
– Референдумското изјаснување почна уште вчера кога гласаа затворениците, болните и старите и изнемоштени лица. Процесот се одвива беспрекорно без никакви проблеми. Во гласачкиот список се запишани 19.459 граѓани со право на глас кои треба да се изјаснат во текот на денот, најдоцна до 19 часот, изјави Гордана Поп-Кочева, претседател на ОИК Гевгелија.
За да биде успешен реферндумот на гласање треба да излезат најмалку 50 отсто плус еден од запишаните граѓани во гласачкиот список.
Активистите на граѓанската иницијатива „Спас за нас“, која е иницијатор на референдумот, подолго време предупредува дека експлоатацијата на земјиштето на планината Кожуф ќе се врши со експлозив и голема механизација, а потоа за да се одвои златото ќе биде употребувана постапката лужење, а тоа значи и употреба на цијанид.
Советниците на ВМРО-ДПМНЕ и СДСМ во општина Гевгелија беа едногласни во однос на тоа дека за вакво прашање мора да одлучат граѓаните. Дел од нив веќе побараа Кожуф да се прогласи за природно заштитено подрачје.
Државната секретарка во Министерството за животна средина Соња Лепиткова пред два дена изјави дека граѓаните на општина Гевгелија се изманипулирани од луѓе кои даваат нестручни паушални изјави за влијанието врз животната средина на рудник кој не се знае дали ќе се отвора бидејќи моментално на теренот сѐ уште се вршат испитувања кои треба да утврдат дали има руда која содржи злато.