Македонија внимателно го следи развојот околу случувањата со Јужен тек, кои, во секој случај, не зависат директно од нас. Делот кој зависи од нас, во смисла на подготовки од наша страна, е комплетиран, изјави денеска портпаролот на Владата Александар Ѓорѓиев, одговарајќи за тоа кој е ставот на Владата по последниот развој на настаните поврзани со гасоводот Јужен тек.
– По повод најновиот развој на ситуацијата поврзана со одлуките на Бугарија, и доколку тие бидат на тој начин реализирани и непроменети, Владата веќе разработува анализи во врска со можностите за реализација на планираните проекти во рамките на сегашните количини и капацитети на природен гас кои може да се обезбедат. Според првичните проценки, гасификацијата на Скопје не е доведена во прашање во случај на неможност за реализација на Јужен Тек, рече Ѓорѓиев.
Вчера Александар Дуковски – директор на Агенцијата за енергетика изјави дека ова прашање ќе се дискутира кога ќе се знаат сите факти. Бугарија официјално се уште не се изјаснила за запирање на изградбата на гасоводот.
Откако бугарскиот премиер Пламен Ошарски попушти под притисокот на ЕУ и пред два дена изјави дека Бугарија привремено ги прекинува сите активности околу гасоводот Јужен тек, вчера и српскиот вицепремиер Зорана Михајловиќ изјави дека Србија треба да ги одложи активностите околу рускиот гасовод.
-Додека не завршат разговорите на Бугарија со Брисел и на ЕУ со Русија, и ние прекинуваме. Или додека Русија не ја промени трасата. Но, се разбира, резултатот и од едното и другото сценарио значи одложување на работите и во нашата држава, изјави Михајловиќ за „Блиц“.
Сепак, нејзините изјави не претставуваат никаква формална одлука на владата на Србија. Премиерот Александар Вучиќ изјави дека српската влада немала седница за да донесе ваква одлука и дека за тоа треба подлабоко да се размисли.
„Таква одлука треба да донесе Владата на Србија, која не заседавала. Што се однесува до нас, нам се‘ ни тече како што беше планирано околу проектот“, рече Вучиќ.