Продажбата на нови автомобили во првите 4 месеци од годинава бележи пад од 17,7 отсто споредено со истиот период лани, а падот само во април изнесува 26,6 отсто, покажуваат податоците на импортерите.
Во април, најмногу продадени автомобили има Фолксваген, а од почетокот на годината Шкода заради продажбата на коли од марката Јети на македонската полиција. Таа во првите 4 месеци има продадено 288 автомобили, Волксваген 232, Форд 97, Опел 68 и Шевролет е на петто место со 60 продадени автомобили.
Продажбата на нови коли падна и во 2012 година и тоа 31 отсто споредено со 2011 до бројката од 4.816.
Кога станува збор за увозот на сите видови возила во првите 4 месеци, тој бележи раст од 6 отсто до бројката од 12.368, покажуваат податоците на Царинската управа.
Главна причина за ова е зголемениот увоз на стари автомобили кој во првите 4 месеци пораснал за 14 отсто до бројката од 10.327, додека увозот на нови автомобили паѓа и тоа од 1.354 лани во првите 4 месеци на 1.083 годинава.
Кај камионите има пад од 1 отсто кај новите увезени, но расте бројот на старите и тоа од 519 лани на 580 годинава.
Кај автобусите, пак, во првите 4 месеци од годинава не е увезен ниту еден нов автобус за разлика од лани кога оваа бројка изнесуваше 140. Причината за големиот број увезени нови автобуси лани се кинеските автобуси, кои Владата му ги подари на ЈСП Скопје. Но, кога државата ќе се тргне од пазарот, како годинава, тогаш бројката паѓа на нула.
Значителен пад има и кај старите увезени автобуси и тоа за над 4 пати – од 258 во првите 4 месеци лани на само 82 годинава.