Најмалку 12 лица се повредени во пожари меѓу Ерусалим и Тел Авив во централен и јужен Израел, објавија израелските медиуми. Главниот автопат помеѓу двата града е затворен, а полицијата ги повикува луѓето да ја избегнуваат таа област.
Спасувачката служба соопшти дека 63 екипи, 11 авиони и два хеликоптери се борат со пожарите, кои се шират поради силните ветрови.
Според медиумските извештаи, пожарникарите се борат со нов пожар што избувна во близина на градот Беит Шемеш, обидувајќи се да спречат неговото ширење кон куќите. Исто така, службите за итни случаи гаснат серија пожари во ридовите околу Ерусалим.
Видеата објавени на социјалните мрежи покажуваат како возачите бегаат од своите возила на автопатот помеѓу Ерусалим и Тел Авив.
Пламени се гледаат од двете страни на патот. Досега, девет лица се спасени од возила кои беа зафатени од чад.
Четири возила се запалија. Неколку лица претрпеле полесни повреди од вдишување чад, соопшти службата.
Израелскиот министер за одбрана Израел Кац го повика командантот на израелските одбранбени сили Ејал Замир да ја распореди израелската војска за да помогне во гаснењето на пожарот.
„Се наоѓаме во национална вонредна состојба и мора да ги концентрираме сите расположиви ресурси за да спасиме животи и да ги контролираме пламените“, се вели во соопштението од канцеларијата на Кац.
Противпожарната и спасувачка служба нареди евакуација во близина на градот Модино поради „пожари кои излегоа од контрола“.
Палестинската самоуправа понуди да испрати противпожарни екипи за да помогнат во гаснењето на пожарите во областа на Ерусалим, изјави безбедносен извор за „Тајмс оф Израел“.