Ниту еден погрешен чекор не ја расипа веселата и убава атмосфера во грчкото село Псарадес (Нивици) на тромеѓето помеѓу Грција, Македонија и Албанија на денешното потпишување на конечниот Договор за решавање на спорот со името, ниту пак за време на заедничкиот ручек во Отешево. И сончевото време му беше сојузник на овој ден што многумина го нарекоа “историски”.
Пред почетокот на официјалната церемонија главна ѕвезда, како и на претходните средби помеѓу официјалните претставници на Македонија и Грција во последниве шест месеци, беше грчкиот министер за надворешни работи Никос Коѕијас кој беше видно расположен и се појави со неговиот заштитен знак – шапката.
Во меѓувреме грчката делегација, составена од членови на Парламентот, го искористи доцнењето на почетокот н церемонијата и се сликаа еден со друг покрај знамињата на Македонија, Грција и Албанија а не изостанаа ниту селфи сликите.
Како што веќе беше јавено утринава, Договорот за решавање на спорот со името беше потпишан денес на грчката страна на убавата Преспа во селото Псарадeс а потоа двете делегации со чамци дојдоа во Отешево на ручек и на здравица.
Мени за прослава на историскиот договор
НОВА дознава дека ручекот почнал на традиционално македонски начин. Гостите почнале со ѓомлезе, бело сирење и пинџур а била послужена и нашата жолта ракија “Антика” . Главното јадење беше телешки бифтек со сос од вино и печурки. За десерт била послужена баклава и палачинка со крем од ванила и овошје. Сето тоа било залиено со македонско вино од “Тиквеш”.
Македонските домаќини, европските и грчките гости биле исклучително задоволни од квалитетот на се што било ставено на маса.
Вратоврската, Заев и Ципрас
Откако завршија со говорите и Договорот беше потпишан од министрите за надворешни работи, премиерот Заев се доближи до грчкиот премиер, го прегрна и му ја подари својата темно црвена вратоврска. Беше очигледно дека двајцата премиери, двајцата родени во 1974 година, успеале, преку овие долги и тешки преговори, да се зближат и да станат пријатели.
Ципрас ја зеде и ја стави во џебот, но еврокомесарот Јоханес Хан ја стави вратоврската во џебот од сакото на Ципрас како украсно шамивче.
Грчкиот премиер Ципрас никогаш не носи вратоврски, дури ни на вакви свечени церемонии.
Родендени и песни
Медијаторот Метју Нимиц год оби најубавиот подарок за својот денешен 79 роденден, како што рече самиот:
„На моето семејство му кажав дека оваа година не сакам подароци за роденденот, бидејќи ќе добијам голем подарок од Зоран Заев и Алексис Ципрас. Мојата работа е завршена, а сега останува на премиерите на двете земји да почнат со примена на договорот, за да ја продлабочат соработката помеѓу двете земји. Мене ми беше чест што бев медијатор и што можев да посведочам на потпишувањето на овој договор“, кажа Нимиц, кој во 1999 година го наследи Сајрус Венс како специјален претставник на Обединетите нации во решавањето на спорот за името.
Имаше и песни. Прво онаа за среќен роденден а потоа песната на мирот како што изјави Ципрас.
Коѕијас за добредојде му ја испеа на Нимиц познатата „Среќен роденден“. Без честитика и песна остана еврокомесарката Федерика Могерини која пак вчера го прослави 45ти роденден.
– Денес овде во Преспа почнуваме да пишуваме нова среќна песна, рече грчкиот премиер во обраќањето за време на церемонијата на потпишување на договорот меѓу Македонија и Грција.
Алексис Ципрас откри дека е љубител на балканската музика, особено на блех музиката, но и на среќните и весели мелодии од регионот и рече дека „дојде време повторно да пееме среќни песни на Балканот, а денес се прави првиот, смел чекор во оваа насока.
– Една таква нова песна започнуваме да пишуваме овде во Преспа. Нашата цел е оваа песна на радоста да се пее многу векови и од многу идни генерации, на нашиот јазик и на вашиот јазик, во нашата земја и во вашата земја, од нашиот народ и од вашиот народ. Песна што ќе го слави мирот, рече грчкиот премиер.
И самиот чин на потпишување на договорот помина во добро располежение. Грчките пратеници неколку пати го прекинуваа обраќањето на Ципрас и со громогласен аплауз го одобруваа секој негов збор.
Никој од официјланите претставници на Македонија и Грција како и оние на меѓународната заедница, не штедеа зборофи на пофалба.
Целата церемонија помина под силно полициско обезбедување и голем интерес на медиумите.