Лина Ѓорческа го заврши настапот на Австралија опен во квалификациите. Но, искуството што го доживеа при двата настапа во Мелбурн парк е непроценливо за неа. И на резултатски план во дебитантското учество на гренслемот и за поддршката што ја имаше од групата македонски иселеници на трибините против Викери, Галфи и Фогел.
„Нема зборови за опис на ова. Ви благодарам“, напиша Лина Ѓорческа покрај фотографијата со 30-тина Македонци крај теренот 13 по поразот во финалниот квалификациски натпревар.
Најдобрата македонска тенисерка и спортистка на годината за 2016 година не криеше дека е пријатно изненадена од интересот на дел од македонската дијаспора во Австралија да ја следи во настапите, да ја бодри за време на дуелите, да бара автограми и фотографии за спомен. Хит е во домашната спортска јавноста, а беше хит и меѓу сонародниците во Мелбурн. Се надеваме дека така и ќе остане. Не само во 2017 година туку и во многу од наредните по оваа.
„Во победа или пораз, ние сме со тебе. Само продолжи да напредуваш, сигурни сме дека те следи голем успех“, беше само еден од многуте коментари на нејзиниот Фејсбук профил.