Екс министерката за внатрешни работи Гордана Јанкулоска е осудена на 6 години казна затвор за злоупотреба на службената положба за набавката на мерцедесот од 600.000 евра.
Јанкулоска не беше присутна на во судницата. Таа се наоѓа во Кривичниот суд на рочиштето за случајот за масовното прислушување Таргет Тврдина, каде ја информирала судијката дека нема да присуствува на изрекувањето на пресудата бидејќи нејзиното присуство не е задолжително.
Обвинителката од СЈО Фатиме Фетаи по изрекувањето на пресудата побара Јанкулоска да и биде изречена мерка куќен притвор, поради опасност од бегство, но да се земе предвид дека таа е мајка на малолетно дете.
Судењето за Јанкулоска почна на крајот на август годинава, откако обвинетата се породи. Неа и се суди посебно откако Судот го прифати барањето на адвокатите за лекарското боледување поради нејзината бременост.
Во „Тенк“ претходно беа осудени поранешниот премиер Никола Груевски на две години казна затвор и поранешниот помошник министер во МВР, Ѓоко Поповски на 6,6 години затвор, за набавка на блиндирано моторно возило „Мерцедес С 600 Гард“ во вредност од 600 илјади евра.
Двајцата се жалеа до Апелацискиот суд за висината на казните. Апелација во петокот соопшти дека жалбата на Груевски е отфрлена и му ја потврди затворската казна од две години. На Поповски, пак, пресудата му е преиначена на четири ипол години затвор.