До Европската комисија денеска е доставена граѓанска иницијатива насловена „Мојот глас, мојот избор: За безбеден и достапен абортус“ со која се бара ЕК да поднесе предлог за финансиска поддршка за извршување сигурен прекин на бременоста за сите оние во Европа кои немаат пристап до безбеден и легален абортус.
Иницијативата, која беше лансирана во април годинава, добила поддршка од 1.124.513 граѓани на ЕУ.
За да се најде на разгледување пред Европската комисија, една граѓанска иницијатива треба да добие поддршка од минимум еден милион граѓани од најмалку 19 земји членки на ЕУ.
Како што соопшти Европската комисија, иницијативата не се однесува на легализирање на абортусот на ниво на ЕУ, туку на почитување на одговорностите на земјите членки за дефинирање на нивната здравствена политика и за организацијата и овозможување на здравствени услуги и медицинска грижа.
Врз основа на ваквата иницијатива, Европската комисија сега има рок до 2 март 2026 година да донесе конечна одлука за нејзино прифаќање или одбивање, водејќи се од принципот, како што наведе, дека таа „нема за цел поткопување на законодавството за јавен ред на земјите членки или на здравствените и етичките избори на земјите членки при вршење на нивната надлежност за здравствените прашања“.
ЕК најави дека во прилог на разгледување на иницијативата во текот на наредните недели ќе одржи средба со иницијаторите, по што и Европскиот парламент ќе организира јавна расправа за предлогот.
Во соопштението на Комисијата се нагласува дека примањето на иницијативата нема никакво влијае врз нејзината конечна одлука, ниту пак значи дека пред тоа таа би презела каква било потенцијална активност што произлегува од предлогот.
Иницијаторите на предлогот наведуваат дека тој им за цел да го направат животот на жените послободен, побезбеден и подобар, без разлика каде живеат во Европа и во какви услови се наоѓаат.
Неможноста за пристап до абортус во многу делови од Европа не само што ги става жените во ризик од физичка повреда, туку и им создава прекумерен економски и ментален стрес на жените и семејствата, кои честопати се на маргините на општеството, се наведува во иницијативата.
Според предлагачите, третирањето на репродуктивната грижа како луксуз не ги намалува абортусите, туку едноставно ги тера жените да бараат небезбедни прекини на бременоста.
За да го промениме ова, бараме од Европската комисија – во духот на солидарноста – да поднесе предлог за финансиска поддршка на земјите членки за извршување на безбедно прекинување на бременоста за сите во Европа кои се уште немаат пристап до безбеден и легален абортус. Голем број животи се прекинати, нарушени и изгубени поради немањето пристап до безбеден абортус. Ова мора да престане. Со оваа европска граѓанска иницијатива, ќе преминеме кон поправедна политика што ги изразува нашите европски вредности со поголема сочувствителност и поконкретно, се додава во предлог-иницијативата.