Град Скопје обвинува дека под силен политички притисок, бизнисменот Асмир Јахоски од „Пуцко петрол“ се приклучува кон обидите за креирање хаос во Скопје. Иако има активен договор со ЈСП за испорака на нафта, Јахоски, соочен со обвиненија и закани со затворска казна, ја прекина доставата. Од Градот обвинуваат дека Управниот одбор на ЈСП, предводен од ВМРО-ДПМНЕ и Мицкоски, заедно со Јахоски, се обидуваат да прават политичките игри за предизборен дефокус од јавниот гнев од штетата што му ја нанесоа на Скопје во изминатите четири години.
„Истото сценарио се повтори и пред новогодишните празници – граѓаните беа оставени на студ и горештини, само за да се задоволат суетите на политичките лидери од кои уценетите бизнисмени очекуваат спас од сопствениот „сургун“.
Зарем не направивте доволно хаос во Скопје? Спречивте набавка на нови автобуси, не гласавте бесплатен јавен превоз. ЈСП нема да дозволи идиотските и криминогени постапки на уценети бизнисмени да ги трпат граѓаните“, стои во реакцијата на Град Скопје.
Градските власти најавуваат покренување постапка за материјална и кривична одговорност против „Пуцко петрол“ и Асмир Јахоски, бидејќи со непочитување на договорот свесно се загрозува функционирањето на јавниот превоз.
Д. М. / ЦивилМедиа