Завршена е јавната постапка и потпишано е решението за избор за најповолен понудувач и некаде околу 5 милиони денари (80.000 евра) ќе бидат потрошени на новогодишно украсување на главниот град, соопшти денеска градоначалникот на Скопје, Петре Шилегов.
Одговарајќи на новинарско прашање, на прес-конференцијата за Панорамското тркало и проектот Скопје 2014, Шилегов потенцираше и дека град Скопје овој пат, за разлика од претходното раководство, нема да бидат изненадени од снегот.
„Кризниот штаб неколку пати заседаваше кога е во прашање зимската служба на град Скопје и има определени резерви на сол. Во тек е постапка за дополнување на резервите затоа што нашата проценка е дека не се доволни тие резерви“, изјави Шилегов.
Тој информираше дека уште пред неговото доаѓање, градот имал склучено 2-годишни договори со фирми за ставање на располагање на дополнителна механизација, но и дека механизацијата управувана од градот е подготвена.
„Механизацијата управувана од градот Скопје е во целост подготвена да одговори, така што и денес да падне снег, ние нема да биде изненадени“, рече Шилегов.