По одлуката за колективна аболиција на претседателот Иванов за 56 политичари протестите во земјава не запираат. За утре најавен е протест и во Тетово под паролата #ТетовоПротестира.
„Утре за првпат во нашиот град излегуваме на протест против одлуката за аболиција на претседателот Иванов. Незадоволни од општата состојба во која се наоѓа нашата држава, го креваме гласот против теророт овие години и режимската власт, се вели во повикот.
Протестот е најавен за 19 часот пред зградата на Основниот Суд во Тетово.
Освен континуираниот протест во Скопје, во организација на движењето #Протестирам, по аболицијата протести се одржаа и во Велес, Куманово, Битола, Штип, Струмица, Прилеп, Кавадарци, Охрид, Гостивар и Кочани.
Демонстрантите обединети под граѓанската палтформа #Протестирам бараат итно повлекување на одлуката за аболиција на сите оние против кои се води истрага и е покренато обвинение од Специјалното обвинителство. Се бара итна и неотповиклива оставка на Иванов од функцијата претседател на Република Македонија, произнесување на Уставниот суд за уставноста на Специјалното јавно обвинителство, како и формирање на специјално одделение во Кривичниот суд за случаите на СЈО.
Дел до барањата исто така се и итно повлекување на одлуката за одржување на парламентарни избори на 5. јуни, задолжително присуство на претставници на граѓанското општество во процесот на решавање на кризата. Тие сметаат дека процесот на решавање на кризата треба да се одвива на територијата на Македонија и тоа сè додека не се формира преодна Влада која ќе ги имплементира реформските приоритети од Извештајот на Прибе.