Фотографија на ББС: Граѓани чекаат ред да извадат пари од банкоматите
Се очекува Европската централна банка (ЕЦБ) да прекине да им дава итни заеми на грчките банки со цел да ја одржуваат својата ликвидност, јавува ББС повикувајќи се на свои извори во банката.
Изворот на ББС за економскиот уредник на телевизијата потвдил дека е донесена одлука на Управниот одбор да се стави крај на помошта која доаѓа од ЕЦБ со таканаречените ЕЛА кредити или заеми за ургентна ликвидност. Грчкиот министер за финансии во изјава за ББС за оваа вест вели дека „ваквата одлука може да ја оттурне Грција надвор од еврото“ и дека ова ќе е доказ дека „Европа потфрлила паралелно да ги сочува демократските процеси и монетарната унија“.
Грчките банки досега зависеа дневно од средстата кои ЕБЦ им ги даваше во рамки на ЕЛА кредитите. На ЕБЦ и досега и се префрлаше дека тие, всушност, само го одлагаат банкротот на Грција бидејќи банките одамна им се несолвентни, а благодарение на ЕБЦ успеваат да се одржат. Советот на ЕБЦ досега на грчките банки им даде 83 милијарди евра од ЕЛА кредитите.
Претседателот на институтот ИФО Ханс-Вернер Зин минатата недела во интервју за Дојче Веле ја објаснуваше ползата која Грците ја имаат од ЕЛА кредитите во услови кога од нивните банки наголемо се одлева капитал во милијарди евра.
-Занимливо е и што се случува со кредитите за итни случаи. Со нив прво се враќаат кредити кои мора да ги враќа Атина. Така се спасува грчката држава од неликвидност – тоа е значи индиректно финансирање на државата, што според статутот на ЕЦБ не е дозволено. Второ, со тие кредити се пополнуваат дупките во грчките банки кои се создаваат поради одливот на капитал. А со тоа се финансираат и приватни кредити, вели Ханс-Вернер Зин. „Грците дополнително испечатија 115 милијарди евра и преку банките и’ позајмија на приватната економија“, вели Зин во разговорот за ДВ.
Во Грција веќе завладеа хаос пред банките. Вчера илјадици грчки граѓани буквално ги окупираа шалтерите и банкоматите во обид да ги извадат своите средства поради страв од банкрот. Стравот веќе станува оправдан со оглед на најавите од повеќе поголеми грчки банки дека во понеделник истите нема да отворат. Вчера дури се постави и лимит за вадење средства во готово. Од банкоматите можеа да се повлечат најмногу до 1.000 евра, додека од шалтерите најмногу до 5.000 илјади евра.