Грчката влада објави дека ја подготвила листата со економските реформи, барани од кредиторите и соопшти дека тие ќе бидат испратени во Брисел.
Пратеникот од владејачката партија „СИРИЗА“ Никос Филис соопштил дека делегација на Министерството за финансии пред таканаречената бриселска група од претставници на кредиторите ќе ја претстави листата со 18 реформи.
Филис изјавил дека Владата планира да добие 3,5 милијарди евра од овие мерки за реформи. Тие ја вклучуваат и борбата против даночното затајување, издавање на лиценци за медиумите во земјата, онлајн игри на среќа, како и зголемување на данокот на додадена вредност (ДДВ).
Грчката влада се надева дека реформите ќе стават крај на разликите помеѓу Грција и доверителите во однос на условите под кои Атина може да го добие финансирањето што ќе ја спаси од банкрот или евентуално излегување од еврозоната.
Откако Атина ја претстави листата со реформи, тие ќе бидат разгледани од работната група на Еврогрупата, пред да биде предложена за разгледување од финансиските министри.