Заменичката на претседателот на Владата на Република Северна Македонија Славица Грковска задолжена за политики за добро владеење, денеска, во својот кабинет ја прими амбасадорката на Кралството Шведска, Н.Е. Кристин Форсгрен Бенгтсон.
Амбасадорката Форсгрен Бенгтсон искажaла уверување дека Северна Македонија останува на агендата за развојна соработка на Шведска, со акцент на билатералната соработка меѓу двете земји во рамки на Договорот за развојна соработка помеѓу Република Северна Македонија и Кралството Шведска.
Шведската амбасадорка ја подвлекла важноста на новата шведска Стратегија за развојна помош 2021- 2027 која ја вклучува и Северна Македонија.
Како главни полиња на идната билатерална соработка, амбасадорката ги издвоила зајакнување на демократијата, почитувањето на човековите права и владеењето на правото.
„Вицепремиерката Грковска заблагодарувајќи се на континуираната поддршка од Кралството Шведска во однос на остварување на нашите европски интеграции ги претстави приоритетните активности потенцирајќи дека во фокусот на нејзината работа е ставена поголемата координација и соработка на институциите, на партнерско ниво, со акцент на детектирање на слабостите и изнаоѓање соодветни решенија за нивно надминување. Во оваа насока беше истакната потребата од професионалната јавна администрација поткрепена со интензивна дигитализација за обезбедување квалитетни услуги и бенефити за сите граѓани“, информираат од Владата.