Србија нема да го признае Косово, пред властите на Србија тоа не е поставено како предуслов за влез во Европската Унија, изјави Сузана Грубјешиќ во Париз. Според неа цел на земјата не е членството само по себе туку за време на преговорите, Србија да се промени.
По изјавата на Претседателката на Одборот за надворешни работи на Франција, Елизабет Гигу, дека признавањето на Косово би можело да биде предуслов за Србија на патот кон ЕУ, потпретседателката на српската Влада за евроинтеграции изјави за Танјуг дека тоа не е побарано од Србија и дека тоа е веќе нагласено од повеќемина европски претставници.
,,Секако дека наш одговор за признавање на Косово нема. Но, во овој момент ние разговараме само за добивање датум за отпочнување на преговори за приклучок кон ЕУ, а за потполно членство можеме да разговараме после тој долгогодишен и макотрпен процес на преговарање”, изјави Грубјешиќ
Според неа, Европската Унија пред се има проблем со своите пет земји членки кои ја немаат признаено независноста на Косово, и дека е невозможно да се предвиди како ќе изгледа Унијата во иднина.
Грубјешиќ денеска се обрати пред членовите на Одборот за надворешна политика на Францускиот парламент, каде некои од нив се заложуваат да Србија еден ден стане член на ЕУ.
,,Јас мислам дека тоа ќе се случи еден ден, но ние сакаме сега да го започнеме процесот на преговарање за кој не знаеме колку ќе трае, но сигурни сме дека за време на процесот, Србија ќе се промени и ќе ги усвои европските стандарди и вредности”, изјави таа во својот говор.
Таа заврши со тоа дека Србија потполно географски, културолошки и економски припаѓа на европското семејство, и дека таа припадност треба да стане политичка и институционална.