Прво во судницата сведочеше Бисерка Јовановска Ќаева, сосетка на поранешниот премиер Никола Грувески кој побегна во Унгарија, а сега му се суди во отсуство. Таа сведочеше дека купила стан на улицата Бихаќка и така му станала сосетка на тогашниот премиер.
– Јас и сопругот бевме сопственици на тој стан кој беше купен на кредит, редовно го плаќавме и го отплативме, рече сведокот и објасни дека во зградата на Бихаќка влегле меѓу првите станари.
-Станот беше со број 16 и имаше квадратура од 57 квадратни метри. Имаше и поголем но беше поскап, а имаше и помали, гарсоњери. Нашиот стан беше во иста линија со поголемиот стан кој подоцна го купи тогашниот премиер Никола Груевски, рече Ќаева.
Таа во одговорите што ги даде на прашања од обвинителката Лиле Стефанова објасни дека станот го купиле за својата ќерка која била студентка, таму не живеела, само го користела кога со друштво одела во тој стан.
Семејството Ќаеви подоцна го продале тој стан затоа што бил мал за семејството, а рече и дека постојано имало контроли, биле легитимирани кога влегувале дома од обезбедувањето на Груевски, но пред се затоа што станот бил мал решиле прво да им го понудат на соседите, но и на поранешниот премиер.
– Јас, лично не се видов со тогашниот премиер, туку со луѓе овластени од него со кои отидовме на нотар и се изврши купопродажбата, рече Ќаева.
Според обвинението, Груевски кој живееше со семејството на Бихаќка имал уште два стана во истата зграда, а кои само црно на бело биле на други лица, како наводни сопственици, а кои. никогаш не влегле во тие станови. Токму ова денеска беше во фокусот на сведочењата и на другите сведоци. По сосетката на Груевски, сведочеше и бинисменот Илија Гечев.
Стојанка Митреска