Поранешниот премиер и лидер на ВМРО-ДПМНЕ, Никола Груевски по завршувањето на денешното рочиште за случајот „Титаник“, изјави дека секогаш има судења кога се преговара името со Грција.
„ И денеска како што можевте да забележите на електронските агрегати тема број еден е „Титаник“, а тема број два е името. Минатиот пат кога имавме рочиште за „Титаник“, имаше преговори за името во Виена, денеска има преговори во Охрид. Па, сега вие заклучете што е една од главните цели на овој процес“ изјави Груевски денеска пред новиот Кривичен суд каде се одржуваше рочиштето за предметот „Титаник“ во кој покрај него се обвинети уште 20 лица за десетина дела поврзани со изборни нерегуларности.
Адвокатот Еленко Миланов на почетокот на денешното рочиште побара изземање на судиите Осман Шабани и Огнен Ставрев и од овој предмет, бидејќи, како што кажа, повикувајќи се повторно на интервјуто на специјалната јавна обвинителка Катица Јанева во кое таа кажала дека дел од судиите биле прислушувани или ги имало во „бомбите“. Тој побара да се провери дали судиите Ставрев и Шабани биле прислушувани за што, како што рече, досега не добил одговор од СЈО .Судијата Осман Шабани изјави дека барањето на адвокатот ќе го проследи до Апелацискиот суд.
Претходно другиот адвокатот на Никола Груевски, Димитар Дангов, даде приговор до судијата Осман Шабани дека камерата со која се снима рочиштето не ги опфаќа сите обвинети во судницата, па, како што рече, видеозаписот нема да биде целосен.
Судењето за случајот „Титаник“ на СЈО во Кривичниот суд Скопје ќе продолжи на 26 април.
Сите обвинети во случајот „Титаник“, Никола Груевски, Мартин Протуѓер, Кирил Божиновски, Миле Јанакиески и Гордана Јанкулоска, беа присутни на денешното рочиште.
Тие се осомничени од СЈО за злосторничко здружување, повреда на избирачкото право, повреда на слободата на определување на избирачите, поткуп при избори и гласање, уништување изборен материјал и злоупотреба на средства за финансирање изборна кампања.