Специјалната обвинителка Фатиме Фетаи побара Никола Груевски, првообвинет за Насилствата во Центар, да биде приведен, бидејќи постојано доцни на ова и на сите останати судења кај што е обвинет.
-Според член 380 став 3 од Законот за кривична постапка, треба да биде приведен, ова не е во ред, рече Фетаи.
-Вас не ве почитува чесен суде, не нас обвинителите. Пратете полиција по него, поминаа 20 минути како го чекаме сите овде седнати во судницава, додаде обвинителот Гаврил Бубевски.
Веднаш потоа обвинетиот Груевски влезе во судницата, а судијата Душан Јосифов го опомена дека пречесто доцни, на што Груевски ништо не одговори.
Денешното рочиште за случајот во кој, покрај Груевски, обвинети се и поранешниот министер за транспорт и врски, Миле Јанакиески, пратеничката на ВМРО-ДПМНЕ, Даниела Рангелова, и уште девет лица, не беше одложено иако еден од обвинетите Митко Пецов побара да си оди дома, бидејќи неговата сопруга требало да прими инсулинска терапија. Судијата Душан Јосифов не му дозволи да си замине.
На денешното рочиште за „Насилство во Центар“ сведочат двајца советници од СДСМ.
На претходните судења вина признаа четвртообвинетиот Томислав Лазаров и петтообвинетиот Јордан Ристевски и добија условни казни.