По обвинувањата за сексуално малтретирање упатени кон Доналд Трамп, група жени во понеделникот, на прес-конференција, изнесоа детали за тоа како и на кој начин се нашле во непријатна ситуација со актуелниот претседател на САД, пренесе Си-Ен-Ен.
„Ова било континуирано недолично однесување и перверзија од страна на господинот Трамп. За жал, ваквото однесување не е реткост во нашето општество и луѓе од најразлични општествени слоеви може да бидат жртви. Единствената причина зошто сум овде денеска е бидејќи напаѓачот стана претседател на нашата држава“, изјавила Рејчел Крукс, кој го обвинува Трамп дека ја бакнал во уста без нејзината согласност во 2005 година.
Обвинение кон Трамп упати и поранешната мис на Северна Каролина од 2006 година, Саманта Холви. Го обвинува дека Трамп ја допирал по градите а допирал и друга девојка по колковите. Најмалку 15 жени го обвинија Трамп јавно, од сексуално малтретирање до полов напад.
Дури 13 од нив тврдат дека биле директно нападнати, а 2 дека биле сведоци на случувања кои им предизвикале непријатни чувства. Сите обвинувања се од различни временски периоди пред тој да стане претседател на најмоќната држава на светот.
Портпаролот на Белата куќа, Сара Сандерс потенцираше дека сите обвинувања се пред тој да биде избран за претседател и дека Трамп веќе ги има отфрлено сите обвинувања. Сандерс во изјава за јавноста уште дополни дека Трамп имал и сведоци кои му ги потврдуваат тврдењата.
Трамп е обвинет најчесто од девојки кои во минатото биле прогласени за мис на своите држави од 90-тите наваму, кога тој беше многу познат бизнисмен.
„Настаните никогаш не се случиле. Никогаш. Сите овие лажги ќе бидат тужени кога ќе завршат изборите“, изјави Трамп во 2016 година, иако никогаш нема поднесено тужба.
Обвинувањата кон Трамп се последните во редот обвинувања, дебати и јавно отворање по сексуални малтретирања, кои започнаа по падот на моќниот продуцент Харви Вајнштајн.
Оттогаш наваму обвинети се, а и прифатиле вина неколку јавни личности, меѓу нив и познатиот актер Кевин Спејси.