Генералниот секретар на ОН, Антонио Гутереш, смета дека мировниот процес меѓу Израел и Палестинците е близу до колапс и дека решение со две држави е подалечна перспектива од кога било досега.
– Вистината е: Ние сме на пресвртна точка, рече Гутереш на отворање на конференција организирана од Саудиска Арабија и Франција за мирот на Блискиот Исток.
Решение со две држави е подалеку од кога било досега, додаде тој, осврнувајќи се на решението кое би овозможило Израел да коегзистира заедно со палестинска држава.
Шефот на ОН верува дека конфликтот би бил решлив доколку постои политичка волја и храбро лидерство, што според него не е очигледно.
Гутереш рече дека „ништо не може да ги оправда ужасните“ напади на палестинската исламистичка милиција Хамас против Израел на 7 октомври 2023 година. Но, рече тој, ниту она што се случи оттогаш не може да се оправда.
Во терористичките напади предводени од Хамас беа убиени околу 1.200 луѓе во Израел и киднапирани околу 250 заложници во Појасот Газа, и ја предизвикаа сегашната војна во Газа.
Ништо не може да го оправда уништувањето на Газа што се одвива пред очите на светот, рече Гутереш.
Тој нагласи дека мора да престане „изгладнување на населението, убивањето десетици илјади цивили, понатамошна фрагментација на окупираната палестинска територија, немилосрдно проширување на населбите, пораст на насилството од доселениците врз Палестинците, уривање на домови и присилно раселување на населението“.
Францускиот претседател Емануел Макрон минатата недела најави дека Франција има намера да ја признае палестинската држава подоцна оваа година.
На конференцијата не се очекува напредок со оглед на ескалацијата на Блискиот Исток и фактот што Израел и неговиот најблизок сојузник, САД, не учествуваат, пренесе ДПА.