Синоќешната одлука на лидерите на четирите политички партии, следните парламентарни избори да се одржат на 11.декември ја поздравија и еврокомесарите Федерика Могерини и Јоханес Хан.
Во заедничко соопштение тие го поздравуваат договорот оценувајќи дека се донеле повеќе важни одлуки за имплементирање на Пржинскиот договор.
„Ги повикуваме сите политички партии стриктно да ја почитуваат кредибилноста на изборниот процес, да им дозволат на граѓаните слободен избор, а по изборите, да формираат влада која ќе се зафати со суштински реформи и ќе работи во интерес на сите граѓани“, се наведува во заедничкото соопштение.
Тие повторуваат дека ЕУ ќе продолжи со својата поддршка во целиот процес и ќе ѝ помага на земјата да се врати на евро-атпантскиот пат.
По синоќешниот потпис на датумот за избори, американскиот претставник во земјава, Џес Бејли порача дека од суштинско значење е дејствувањето на партиите, медиумите и граѓаните до изборите.
„Тоа се оние одлуки кои што на крајот ќе ја доведат земјата до кредибилни избори и ќе овозможат државата да оди напред во реформи кои што ќе доведат до евроатлантски интеграции. Тоа ќе биде критичната точка која што ќе се случи. Медиумите ќе имаат важна улога во тоа“, порача Бејли.