Повикуваме сите да се воздржат од какви било активности и изјави кои би можеле да ги разгорат меѓуетничките тензии кои може да ги поткопаат добрососедските односи. Никој не треба да биде во искушение да си игра со оган, стои во соопштението од ЕК, по последната средба на Јоаханес Хан со Груевски. Хан го повикува престедателот Иванов да ја преиспита својата одлука и тоа итно.
„Ние денеска остваривме средба со претставници на парламентарните партии и кажавме многу јасно дека сите лидери на земјата, вклучувајќи го и претседателот, мора да ги почитуваат резултатите од последните избори. Во една демократија, секој мора да го признае парламентарно мнозинство.
Затоа, го охрабруваме претседателот да ја преиспита својата одлука, итно. Не смее да се губи време. Очекуваме од сите политички лидери и институции да го спроведуваат демократскиот процес и земјата да тргне по својот својот тек, во интерес на граѓаните. Одложувањата во изминатите месеци веќе донесе штети по економијата на државата.
Повикуваме на брзо формирање на новата Влада која ќе биде посветена на спроведувањето на заостанатите реформи. Партиите и новата Влада се очекува да продолжат со спроведувањето на договорот од Пржино.
Особено, ги повикуваме сите да се воздржат од какви било активности и изјави кои би можеле да разгорат меѓуетничките тензии или да ги поткопаат добрососедските односи. Никој не треба да биде во искушение да си игра со оган. Длабоко сме загрижени за тензиите и говорот на омраза. Точно е дека се гарантира слободата на собирање и слободата на изразување кои се основни права во демократските општества, но тие носат и одговорности.
Во исто време, негативната реторика насочена кон меѓународната заедница и граѓанските организации е сосема контрапродуктивно. Тоа ја поткопува позицијата на земјата на меѓународен план, како и нејзиниот кредибилитет, “се вели во соопштението на ЕК, по средбите на Хан кој дојде со тројцата европратеници Иво Вајгл, Едвард Кукан и Кнут Флекенштајн.
На заминување Анонио Милошевски изјави дека се задоволни од средбата со Хан.
„Задоволни сме од средбата со еврокомесарот Јоханес Хан со кој во отворена дискусија расчистивме неколку дилеми. Разговаравме за ризиците, ако некој се обиде на сила да решава национални прашања, рече Антонио Милошоски од ВМРО-ДПМНЕ по средбата на Никола Груевски со Јоханес Хан и тројцата европратеници.
ВМРО-ДПМНЕ на Хан му предложиле две можни решенија: Зоран Заев да формира малцинска влада со поддршка на ВМРО-ДПМНЕ или нови избори.
На прашање што точно разговарале со Хан тој одговори дека еврокомесарот сам ќе одлучи дали ќе даде изјава и ќе каже што разговарале. Груевски воопшто не даде изјава за медиумите, а не дозволи да се снимаат ниту инсерти од средбата.