Актуелниот претседател на Иран, Хасан Рохани (68) победи на претседателките избори кои се одржаа вчера. Шефот на изборниот штаб на Рохани, Хамид Абутелеби преку Твитер пренесе дека претседателот освоил преку 60 проценти од гласовите.
Според Министерството за внатрешни работи во Техеран, на претседателските избори во Иран, одржани вчера (19 мај) учествувале преку 40 милиони гласачи, што претставува излезност од 70 проценти.
Многумина граѓани овие избори ги сметаа за судбоносни за својата земја. Избирачите се определија за 68-годишниот актуелен шеф на државата, кој ветува натамошно отворање на земјата, поголема либерализација и заживување на економијата, закочена поради меѓународните санкции. Рохани во текот на својот прв мандат го постигна Атомскиот договор на Иран со светските сили, за што за возврат е договорено укинување на најголемиот дел од санкциите.
Ебрахим Раиси, најсериозниот противник на Рохани важи за близок човек на Врховниот верски водач, ајатолахот Али Хамнеи, а ја има и поддршката на државните медиуми. Раиси ја обвини владата за неправилности во текот на гласањето.