Владејачката коалиција во Хрватска предводена од ХДЗ ќе започне постапка за гласање на недоверба кон премиерот на владата, Тихомир Орешковиќ.
Шефот навладејачката ХДЗ, Томислав Карамарко, соопшти дека неговата партија ќе почне постапка за отповикување на премиерот на хрватската Влада, Тихомир Орешковиќ. Аргументите на ХДЗ се дека владата ваква каква што е не е функционална и наводно не можат да се спроведат почнатите реформи без единствена хомогена влада.
„Едноставно би требало да престане ова што сега е на сцената. Лоши односи, полуодноси. Хрватска нема време и трпение за такви односи“, изјави Томислав Карамарко, претседател на ХДЗ, пренесува новинската агенција „Танјуг“.
Премиерот Орешковиќ, пак, изјави дека тој нема проблем повторно да ја побара довербата од парламентот обвинувајќи го Карамарко дека е проблематичен за државата.
„Мојата порака е јасна, ја добив поддршката од парламентот и не се плашам да ја побарам пак. Ја почитувам ХДЗ како партија, но Карамарко е огромен товар за оваа влада и за ХДЗ и јас сум уверен дека на крајот на денот ХДЗ ќе донесе исправна одлука“, рече тој алударајќи на тоа дека ХДЗ не е единствена околу поддршката на нивниот претседател на партија.
Огранокот на ХДЗ во Вараждин веќе побара од Карамарко да си даде отказ од функцијата прв потпретседател на хрватската влада за да може истата конечно да функционира.
Карамарко е контроверзна политичка фигура во Хрватска, пред се поради се позасилената реторика која што ја користи, а често, особено во предизборната кампања предизвикуваше остри реакции во демократската јавност поради отвореното користење на усташките симболи.
Хрватскиот парламентот има 30 дена за да го разгледа гласањето на доверба.