Хелсиншкиот комитет за човекови права бара итно да се санкционира полициската бруталност врз навивач по завршување на ракометниот натпревар помеѓу ракометните клубовите Вардар и Пелистер.
Откако на социјалните мрежи се појави видео снимка на која се гледа како полициски службеници тепаат навивач на „Чкембарите”, реакција стигна од Хелсиншкиот комитет за човекови права, од каде велат дека снимката покажува употреба на прекумерна физичка сила.
„Ваквото постапување на полициските службеници дополнително ја продлабочува недовербата која граѓаните ја имаат во полицијата, а Северна Македонија континуирано добива и забелешки од страна на меѓународната заедница, како што е Европскиот комитет за заштита од тортура и нечовечко или понижувачко постапување или казнување кој и во својот последен извештај за нашата држава објавен во мај 2021 година нотира пречекорување на полициските овластувања и употреба на прекумерна сила од страна на полициските службеници за време на приведување, во полициска станица, но и подоцна од страна на затворската полиција“, се вели во дописот од Хелсиншкиот комитет за човекови права.
Тие, заедно со Македонското здружение на млади правници бараат од Одделот за внатрешна контрола, криминалистички истраги и професионални стандарди при Министерството за внатрешни работи целосно да го истражи овој случај и доколку се потврдат наодите, инволвираните полициски службеници да бидат соодветно дисциплински казнети. Дополнително, го повикаа Основното јавно обвинителство за гонење на организиран криминал и корупција – Специјализирано одделение за гонење на кривични дела сторени од лица со полициски овластувања и припадници на затворската полиција по допрен глас да оформи предмет со цел водење на кривична постапка против инволвираните полициски службеници и утврдување на нивна кривична одговорност за настанот.
Настанот се случил во вторник, на 29.3.2022, по завршување на ракометниот натпревар помеѓу Вардар и Пелистер. На видео снимката се гледа како едно лице, за кое се тврди дека е припадник на навивачката група Пелистер, лежи на земја додека припадници на полицијата демонстрираат прекумерна физичка сила и средства за присилба врз него, поради што лицето се здобило со телесни повреди.