Денот на Европа, го означува и почетокот на 41. Мајски оперски вечери.
Фестивалот ќе го отвори уметничкиот директор на Операта, Дејан Прошев, а фестивалскиот оган ќе го запали првенката на Македонската опера и балет, Славица Петровска – Галиќ, по што премиерно ќе биде изведена операта „Хофманови приказни“ од Жак Офенбах.
Либретото го напишал Жил Барбие и е базирано врз три кратки приказни напишани од германскиот писател од романтизмот Ернст Теодор Амадеус Хофман.
Дејството се одвива во Нирнберг, Венеција и Берлин на почетокот на 19-тиот век, а главен протагонист е самиот Хофман. Барбие, заедно со Мишел Кери, претходно напишал драма „Хофманови приказни“, продуцирана од парискиот театар „Одеон“ во 1851, која ја гледал композиторот Офенбах, најистакнат претставник на оперетата во Франција.
Светската премиера на операта „Хофманови приказни“ (Les contes d’Hoffmann) во три чина, пролог и епилог, била во 1881 во Париз, а во Македонија првпат била изведена во 1965 година.
На премиерата, со која, вечерва, свечено ќе бидат отворени годинашните Мајски оперски вечери, ќе настапат мецосопранот Ирена Квакалевска (Никлаус), Наде Талевска (Олимпија), Олгица Милевска (Џулиета), Билјана Талевска-Јосифов (Антонија), Ернес Ибраимовски (Линдорф, Копелиус, Дапертуто, д-р Миракл). Сценограф е Марија Ветероска, костимограф Марија Пупучевска, кореограф Олга Панго.