Хрватската полиција рано утрово, во рамки на акцијата „Агрокор“, изврши претрес во „Кулмеровата палата“ во Загреб, сопственост на основачот на концернот „Агрокор“, Ивица Тодориќ.
Не е познато дали во куќата имало некој од семејството Тодориќ, кои до неодамна живееја на оваа адреса. Според хрватските медиуми, претреси се вршат на 60 локации, а опфатени се 15 лица кои некогаш биле на раководни позиции во компанијата.
Полицијата потврди дека досега се уапсени поранешните сопственици Ивица Црнац, поранешен финансиски директор на „Агрокор“, Томислав Лучиќ, екс член на надзорниот одбор на Агрокор, Пирушка Цањуга, поранешна членка на управата на Агрокор и Љерка Пуљиќ, потпретседателка на компанијата.
Утрово во „Кулмеровата палата“ пристигнале и адвокатите на Тодориќ, Чедо Продановиќ и Јадранка Слоковиќ.
Владиниот повереник за „Агрокор“ Анте Рамљак минатата недела поднесе кривична пријава против одговорните во оваа компанија поради неправилности во работењето, утврдени со ревизијата на финансискиот извештај, меѓу кои даночно затајување, незаведување на кредитите и други финансиски малверзации.
Ивица Тодориќ веднаш потоа објави дека ниту едно евро не е отуѓено или скриено.
Своите пораки тој ги пишува на блогот.
-Подготвен сум за тужба, ова е политички процес, напиша последно Тодориќ.
Агрокор е најголемата приватна компанија во Хрватска во која се вработени над 31.000 луѓе. Примарна дејност е производство и дистрибуција на храна и пијалоци, како и малопродажба, а некои од најпознатите марки во сопственост на Агрокор се Фриком, Дијамант, ИДЕА, Јамница, ПИК Врбовец, Ледо, Конзум.