Хрватската влада експресно го повлече нацрт предлогот на законот за семејство, со кој се дефинираше дека „не постои семејство без деца“, по жестоките критики на јавноста.
Нацрт предложениот закон е повлечен еден ден откако беше ставен на јавна расправа.
Лавината критики започна поради неколку спорни одредби, но најмногу поради тесната и исклучително дискриминаторска дефиниција на семејството, според која за семејство се сметаат само двојките во брак со деца, и оние кои се разведени или партнерите им починале, но само доколку имаат деца.
Вака дефинираното семејство во законскиот акт предизвика голем број забелешки и предлози, а од надлежниот ресор е соопштено дека се свесни за важноста на подрачјето што се уредува со законот за семејство (во оригинал Обитељски закон) и дена во најголем интерес на јавноста, Министерството за демографија, семејств, млади и социјална политика го повлекува законот од јавното советување, на доработка.
Пропустот го призна и самиот премиер Андреј Пленковиќ, кој претходно денеска изјави дека „вака натаму нема да може да се работи“.
-Ваквите документи можат да предизвикаат големо внимание и се во многу рана фаза на расправа. Во иднина нема да може да се ставаат закони во јавност додека не ги поминат сите можни координации внатре во владата, изјави Пленковиќ по седницата.
Лидерот на опозицискиот „Мост“ на независни листи Божо Петров изјави дека никако не би било добро доколку брачните сопружници кои не можат да имаат деца да бидат автоматски исклучени.