Околу 70 000 задолжени граѓани можат „да земат здив“ пред новогодишните празници во Хрватска. Државата им простува околу 130 милиони евра, а министерот за финансии на Хрватска се надева дека дополнителни 2 милијарди евра ќе ги отпишат и банките, операторите и комуналните претпријатија. Државата планира да им го смали данокот во зависност од опростениот долг.
На сите кои немаат доволно приватна сопственост за покривање на долговите постари од година дена, државата одлучи да им помогне. Главно станува збор за поранешни трговци кои по затворањето на работата останале должни, објаснува министерот за финансии на Хрватска, Славко Линиќ, признавајќи дека тоа е лоша порака за одговорните плаќачи.
„Не е фер бидејќи тоа се лоши пораки за сите граѓани кои редовно ги плаќаат своите обврски, кои се одговорни во тие плаќања“, рече Линиќ
На ваквите најави реагираше и најголемата опозициска партија. Ивана Малетиќ од Хрватската демократска унија истакна дека владата нуди маркетнишки рашенија откако ја осиромаши земјата. Според неа, луѓето на кои ќе им бидат простени долговите, ќе треба тоа да го платат со нешто, а во меѓувреме да живеат додека во исто време расе невработеноста и падот на производството.
Според хрватските аналитичари, се работи за прави политички-инспирирани потези.
„За едниот дел од граѓаните тоа доаѓа како божиќна и новогодишна честитка. Од друга страна, со тоа се загрозува приходот во државниот буџет“, вели Ивана Ловриновиќ, професорка на Економскиот факултет во Загреб.
Економскиот аналитичар Дамир Новотни за хрватската ХТВ, изјави дека владата можела да направи подобар потег со тоа што на сите граѓани би им отпишала дел од долговите, пракса за која тој вели дека била доста ефективна во другите земји.
Хрватскиот премиер Зоран Милановиќ ги отфрлува обвинувањата. „Тоа е еден од обидите, без влегување во деталите, да на луѓето им се олесни животот. Секако, имајќи во предвид дека се работи за долгови, ќе мора да ги вратат“, изјави Милановиќ.