По вчерашните заеднички заклучоци во врска со новиот Правилник на Хрватска за увоз на свежо овошје и зеленчук, денеска министерот за земјоделство, шумарство и водостопанство Љупчо Николовски телефонски разговарал и со министерот за земјоделство на Хрватска, Томислав Толушиќ, кој покажа интерес за изнаоѓање на решение за настанатиот проблем, соопштија од Министерството за земјоделство.
Сите страни треба да ги почитуваат обврски од договорите за стабилизација и асоцијација меѓу ЕУ и земјите од западен Балкан, оцени Европската комисија во врска со трговскиот спор меѓу Хрватска и западнобалканските земји околу земјоделските производи.
– Европската комисија се уште не го добила писмото на министрите на четирите западнобалкански земји кои бараат Еврокомисијата да интервенира во нивниот трговски спор со Хрватска, меѓутоа ставот на ЕУ е дека сите страни треба да ги почитуваат обврски од договорите за стабилизација и асоцијација меѓу ЕУ и земјите од регионот, соопшти дипломатски извор од Брисел за МИА.
Според дипломатскиот извор на МИА во седиштето на ЕУ, Европската комисија е во контакт со претставници на засегнатите страни во спорот и „моментно ја проценува новонастаната состојба“, проверувајќи дали новите хрватски мерки се во согласнот со обврските од договорите за стабилизација и асоцијација.
Истиот извор апелира до страните во спорот да манифестираат воздржаност и да избегнуваат „заострување на состојбата“.
Реакцијата на Македонија, Босна и Херцеговина, Србија и Црна Гора уследи откако хрватското Министерство за земјоделство минатиот месец воведе нов правилник со кој се зголемуваат фитосанитарните контроли на увезеното овошје и зеленчук од земји што не се членки на ЕУ и го зголеми надоместокот за инспекциски контроли од 90 на 2.000 куни (од 12 на 270 евра).
Министрите за земјоделство на четирите балкани земји вчера имаа средба во Сараево на која побараа Загреб под итно да го повлече овој правилник и да ги прилагоди своите цени за инспекциска контрола со просечната цена во земјите членки на ЕУ и апелираа до Унијата да се вклучи во надминувањето на спорот.
Српските медиуми во меѓувреме објавија дека владата во Белград започнува со остри мерки против хрватската мерка. Од саботата освен овошјето и зеленчикот на строги контроли се подложени и сите други производи од Хрватска, поради што на пзараот нема да ги има во следните 30 дена, доколку процедурата потрае.
Весникот Блиц објави дека Управата за царина добила задача освен фитосанитарни и ветеринарски проверки да прави и лабораториски анализи на сите производи, кои би траеле и до еден месец.