Израелските одбранбени сили (ИДФ) денес соопштија, пренесуваат израелски и светски медиуми, дека погодиле балистички ракетен фрлач во западен Иран, со ракета подготвена за испалување.
Во соопштението се додава дека балистичкиот ракетен фрлач бил забележан од авион на израелските воздухопловни сили (ИАФ) кој летал над Иран, а фрлачот набрзо бил погоден во израелски напад.
Според соопштението на ИДФ, десетици ирански системи за лансирање балистички ракети се уништени во израелските напади досега.
ИДФ соопшти дека „поставила воздушна супериорност од западен Иран до Техеран“ по ноќната операција на ИАФ во која беа погодени десетици ирански системи за воздушна одбрана.
Израел нападна 150 цели во Иран преку ноќ, изјави денес функционер на Израелските одбранбени сили (ИДФ), тврдејќи дека израелските напади ја забавиле нуклеарната програма на Иран.
Функционерот рече дека нападите врз нуклеарните објекти на Иран во Натанц и Исфахан можеле „значително“ да ги оштетат тие објекти, објави Си-Ен-Ен.
Слушнав некои експерти или луѓе како зборуваат во вестите дека сè што можеме да направиме е да го одложиме нуклеарниот план за неколку недели. Сакам повторно да ви кажам, според нашето првично разбирање… ќе биде потребно многу повеќе од неколку недели за да се поправи тоа“, рече израелскиот функционер.
Според функционерот, Израел имал „конкретни разузнавачки информации“ дека Иран „се движи кон нуклеарна бомба“ во објектот во Исфахан. Израел сега верува дека, по воената операција, „воздушниот пат до Техеран“ е ефикасно отворен, рече функционерот.
Не можевме да го кажеме тоа пред неколку месеци, додаде тој.
Осврнувајќи се на деветте ирански нуклеарни научници убиени во израелските напади вчера, службеникот рече дека тие биле „главните извори на знаење“ и „главните сили… во унапредувањето на нуклеарната програма“.