Загреб: Во јануари идната година, по претседателските избори, ќе започне законската процедура потребна за враќање на задолжителниот воен рок, а првите повици на регрути се очекуваат кон средината на 2025 година, извести денеска хрватското Министерство за одбрана.
-Министерството за одбрана подготви законски предлози со кои се регулира основната воена обука, како и други прашања поврзани со нејзиното спроведување. Во однос на изборите за претседател на Република Хрватска и со цел спроведување на законската процедура неоптоварена со овие избори, постапката за донесување на законот ќе започне во јануари 2025 година, одговорија од Министерството за одбрана.
Пред да пристигнат младите полнолетни мажи во касарната, хрватскиот Парламент мора да усвои закони што ја регулираат таа област. Бидејќи пратениците нема да се вратат во собраниските клупи до средината на идниот месец, задолжителниот воен рок нема да започне пред пролет или лето 2025 година.
-Министерството за одбрана планира прво да испрати регрути на основна воена обука кон средината на 2025 година. Јавноста ќе биде информирана за деталите за основната воена обука како и државната служба кога предлог-законите ќе бидат во процес на процес за е-консултации, соопшти Министерството за одбрана.
Ресорниот министер Иван Анушиќ во септември годинава изјави дека инструкторите се подготвени, а регрутите ќе бидат сместени на три локации. „Конкретно, потенцијалот е меѓу 17 и 18 илјади млади луѓе кои секоја година наполнуваат 18 години и кои се наши идни кандидати за служење на основната воена обука“, рече тогаш за време на обиколката на касарната Билогора во Бјеловар.