Издавачката куќа Или-или го објави романот „Бели заби” на познатата британска авторка Зејди Смит. Ова е втора книга на македонски јазик од оваа наградувана писателка, по книгата „Собирач на автограми” која пред неколку години исто така ја издаде Или-или.
Зејди Смит е родена во северозападен Лондон, каде што живее и денес. Авторка е на неколку романи, една збирка раскази и неколку книги со есеи. Нејзиниот прв роман, „Бели заби” (2000), е добитник на наградата “Витбред” за дебитантски роман, на меморијалната награда “Џејмс Тејт Блејк” за книжевност и на “Наградата на писателите на Комонвелтот” за дебитантски роман, и со тоа се вброи меѓу најдобрите сто романи напишани на англиски јазик во втората половина на XX век. Во 2002 година следеше „Собирач на автограми“, со кој Смит се етаблираше како една од најавтентичните и најуспешни британски авторки.
Нејзиниот трет роман, За убавината, во 2005 година беше во најтесниот избор за доделувањето на “Букеровата награда за литература”. Минатата, 2012 година, излезе нејзиниот нов роман, насловен „NW“.
За романот „Бели заби”, критиката пишува:
„Првиот роман на Зејди Смит предизвика голема полемика меѓу критичарите, кои го споредуваа со делата на Чарлс Дикенс, Салман Ружди, Џон Ирвинг… Но, со својот кристално јасен стил, филозофската длабочина и многубројните чудесни, преплетени приказни, младата авторка докажа дека поседува сопствен, уникатен писателски глас, кого светот уште долго ќе го слуша и ќе го памети.” The New York Times
„Бели заби е прекрасен роман, пребогат со мали и големи приказни, растегнат на неколку континенти и низ неколку векови, преполн со хумор, топлина и човечност. Приказна за пријателството и семејството, за домот и љубовта, и за сите нешта кои полека исчезнуваат во нашиот модерен, брз, немирен живот.” The New York Times Book Review.
Книгата на Зејди Смит издавачот ја нуди на „Саботното мени“, програмата за попусите на книги на „Или-или“.