Милош Земан, чешкиот претседател ја именуваше новата техничка Влада. Јиржи Руснок е новиот премиер.
Во рок од 30 дена се очекува новиот владин Кабинет да побара поддршка од Парламентот. Доколку овој министерски состав ги добие гласовите од парламентарното мнозинство, нов министер за финансии ќе биде поранешниот премиер и неуспешен претседателски кандидат, Јан Фишер.
Нов министер за внатрешни работи ќе биде Мартин Пецина, додека за правда ќе биде единствената жена министер во овој состав, Марие Бенешова.
Функцијата нов шеф на дипломатијата ќе му биде предадена на Јан Кохоут.
За прв човек на Министерството за одбрана е предложен повторно досегашниот министер Властимил Пицек. Мартин Холцат, ќе биде новиот министер за здравство, научникот Далибор Штис ќе го води Министерството за образование, а поранешниот пратеник Франтишек Коничек, Министерството за труд и социјална политика.
Јиржи Балвин, кој во 2001 беше дел од раководството на Чешката телевизија (ЧТ), инженерот Јиржи Циенциала и поранешниот заменик-министер за сообраќај Здењек Жак ќе бидат предложени на местата министер за култура, односно за индустрија и трговија и сообраќај.
Мирослав Томан, кој од 2002-2006 година бил на функции во Министерството за земјоделство сега ќе застане на негово чело. Министер за животна средина ќе биде Томаш Подивински и Франтишек Лукл, министер за развој.
Новиот министерски Кабинет ќе има 15 члена, двајца помалку од претходниот состав на Нечас.
Претходната влада на премиерот Петр Нечас беше разрешена откако Нечас поднесе оставка поради вмешаност на неговата најблиска соработничка и уште шестмина функционери во афера на прислушување и корупција.
На 17 јули е закажана вонредна парламентарна седница, на барање на опозициските социјалдемократи на која ќе се гласа за распуштање на Собранието.