Според порталот „А1он“, Унијата на млади сили на ВМРО-ДПМНЕ минатата година организирала летна школа со пари кои од Еразмус биле наменети за невладина организација која се занимава со органско производство.
Владо Мисајловски, Александар Николоски, Тамара Михајловска, позната по изборниот спот со лидерот на партијата Христијан Мицкоски, се само дел од присутните на настанот во август 2019 година на кој присуствуваат 150 луѓе во хотел во Струмица.
https://www.facebook.com/UMSVMRODPMNE/videos/484291619039671/
Видеото се шири на социјалните мрежи вклучително со стотици фотрографии, а придружено со коментари дека првата летна школа на младите сили на партијата била завршена со „многу нови знаења, вештини и нови пријателства“.
И сето ова ќе беше во ред, ако на само еден краток дел од видеото не се гледаше логото на „Еразмус“ – програма со која со европски пари Националната агенција за европски образовни програми дава грантови за различни проекти.
Ова видео под сомнеж го става прашањето дали со европски пари бил финансиран дводневен партиски настан, под превезот на грант што претходно го добила невладина организација.
Лидија Димова, директорка на Националната агенција, во изјава за „А1он“ тврди дека е и самата е изненадена од тоа што го гледа на видеото и дека во тек е интерна истрага за скандалозното појавување на логото на „Еразмус“ на ваков собир.
„Спотот што ни го испративте е од Школата на млади сили на УМС, но и ние забележавме дека на истиот се гледаат плакати од проект финансиран од ‘Еразмус’. Инаку, стануваше збор за проект со кој беше грантирано Здружение за образовни активности – ‘Форум за истражување и мобилност“ од Битола, кој требаше да поттикне создавање на компании за органско производство и претприемачки дух кај луѓето“, вели Димова.
Од ВМРО-ДПМНЕ во писмен допис тврдат дека невладината организација не се јавува како донатор на летната школа и дека истото ќе биде поткрепено со документи, но по завршувањето изборите.
„Унијата на млади сили на ВМРО – ДПМНЕ остварува соработка со многубројни фондации и здруженија на граѓани. Здружението кое што го посочивте не се јавува како донатор на летната школа во Струмица, нити пак на каков бил друг настан организиран од партијата. ВМРО – ДПМНЕ ги поддржува сите свои членови во нивното слободно време да учествуваат на што е можно повеќе обуки со цел истите да се стекнат со дополнителни знаења и вештини“, велат од партијата.