Инспектори на општина Кисела Вода, Град Скопје и од Државниот инспекторат за животна средина и екипа на Минисерството за внатршни работи вршат увид во кругот на фабриката ОХИС каде денеска се излеала течност од цистерна.
Инспекторите дошле на увид по дојава од жителите кои утрово почувствувале миризба во околината на фабриката.
Инспекторите кои беа на теренот изјавија дека според кажувањето на технологот долгогодишен вработен во оваа фабрика тоа бил еден од резервоарите во која била складирана материја метил акрилат мономер, кој е база за производство на синтетички влакна. Неофицијално бил набавен во 2000 година, и ова е некаква залиха која не била употребена.
Марјан Петревски, инспектор за животна средина од Град Скопје вели дека нема некоја поголема штетност, бидејќи како што рече таа мешавина се собира во самиот бетонски базен. Тој вели дека до вечер таа треба да се собере во посебни буриња што се специјализирани за извоз и целата материја е биде однесена во Швајцарија каде ќе биде на понатамошен третман со согорување.
Од Државниот инспекторат за животна средина велат дека истекувањето било во погон во кој фирма препакува и отстранува стари складирани хемикалии кои се неупотребливи и останати од поранешната фабрика, а кои ќе се извезуваат во странство.
– Станува збор за истекување вода од цистерна во која бил складиран метил акрилат мономер. Откако е испразнета цистерната, фирмата има обврска да ја исчисти. При перењето попуштил вентил и течноста се излеала во еден вид бетонска када која е надвор и затоа се почувствувала миризба во околината, тврдат од Државниот инспекторат за животна средина.
Фирмата имала дозвола да препакува т.н. историски отпад кој го пакува во буриња и го извезува во Швајцарија. Станува збор за отпад во количина од 60 до 70 тони.