Ирачки борбени авиони синоќа фрлиле илјадници летоци врз Мосул, предупредувајќи ги жителите на овој град под контрола на Исламска држава за претстојната офанзива, јави Си-Ен-Ен.
„Ние се подготвуваме да го почнеме ослободувањето на Мосул и да ја вратиме сигурноста и стабилноста во регионот“, пишува на летоците.
Со летоците жителите на Мосул се повикуваат да останат во своите домови, да ги затворат вратите и прозорците, да избегнуваат некои региони од градот и да не се доближуваат до позициите на џихадистите.
Турската телевизија НТВ вчера соопшти дека силите на меѓународната коалиција и ирачките сили за безбедност почнале да изведуваат напади врз Исламска држава во Мосул.
Градот, во кој живеат над 500.000 лица, џихадистите го сметаат за нивна престолнина во Ирак. Владините сили им го препуштија на џихадистите речиси без борба во нападот на единиците на Исламска држава на 10 јуни 2014 година, потсетува руската агенција.